Bakı Dövlət Universitetinin “Sabah” qrupunun tələblərinin Vergilər Nazirliyinin Tədris Mərkəzinə tanışlıq səfəri təşkil edilmişdir
14 oktyabr 2017-ci il tarixdə Bakı Dövlət Universitetinin “Hüquq” fakültəsinin II kurs “Sabah” qrupunun tələblərinin Vergilər Nazirliyinin Tədris Mərkəzinə tanışlıq səfəri təşkil edilmişdir. Tədbir çərçivəsində tələbələr Mərkəzin strukturu, dinləyicilər üçün yaradılan şəraitlə tanış olmuş, Vergilər Nazirliyində təhsilin təşkili barədə məlumatlandırılmışlar.
Tədris Mərkəzinin Vergi metodologiyası kafedrasının müdiri Malik Əkbərov “Azərbaycan Respublikasının vergi sisteminin formalaşması və inkişaf tarixi, müasir vəziyyəti və gələcək inkişaf perspektivləri” mövzusunda təqdimatla çıxış edib.
Tədbir Almaniyanın Martin Luter adına Halle-Vittenberg Universitetinin yuniorprofessoru, hüquq doktoru Azər Əliyevin “Blokçeyn texnologiyalarının gələcək perspektivləri” mövzusunda təqdimatı ilə davam edib.
Görüşün sonunda iqtisadiyyatın hüquqi tənzimlənməsi məsələləri barədə açıq müzakirələr aparılıb, Almaniya və Azərbaycan təcrübələrinin müqayisəsi diqqətə çatdırılıb.
