1922-ci ildən xüsusi şəxslərin gəlirləri və fəhlə və qulluqçuların muzdlu işdən
əldə etdikləri gəlirləri müəyyən məbləği aşırdısa, onlardan gəlir-əmlak vergisi
tutulmağa başlandı. Vergi pilləvari mütərəqqi şkala üzrə hesablanırdı və vergi
ödəyicisinin bəyannamələri əsasında yarım il ərzində onun məcmu gəlirindən
tutulurdu. Gəlir vergisi hesablanarkən vergi tutulmayan minimumdan istifadə
edilməsi az gəlirli şəxsləri vergidən azad etməyə imkan verirdi.
1922-ci ilin sonlarında
vərəsəlik vergisi daxil edildi.
Hər bir varis vərəsəlik yolu ilə aldığı əmlakın 1-4 faizi həcmində vergi ödəməli
idi.
Dövlət və kooperativ təşkilatlarından gəlir vergisinin tutulmasına 1923-cü ildə
başlanıldı. Onun dərəcəsi 8 faiz idi, vergiyə cəlb olunan mənfəət isə vergi
orqanları tərəfindən müəssisənin məcmu gəlirləri ilə xərclərinin fərqi kimi
təyin edilirdi.
Elə həmin il kənd yerlərində
vahid kənd təsərrüfatı vergisi
daxil edildi. İlk vaxtlar o, həm pul, həm də natural formada tutulurdu. 1924-cü
ildən isə yalnız pul formasında tutulmağa başlandı.
1925-ci ildə
hərbi vergi daxil edildi ki, onun
da ödəyiciləri 21-40 yaş arasında orduya çağrılmayan kişilər idi. Verginin
dərəcəsi həmin şəxslərin ödədikləri gəlir və kənd təsərrüfatı vergilərinin 25
faizi həcmində idi. Hərbi vergidən daxilolmalar yalnız vətəndaş müharibəsi
əlillərinə köməklik göstərilməsinə sərf edilirdi.
Ölkədə əmtəə pul münasibətlərinin sonrakı inkişafı və qiymətli kağızlar
bazarının dirçəlməsi dövlət rüsumlarının daxil edilməsini tələb edirdi.