Vergi verənlər zümrəsi özündə bütün zəhmətkeş əhalini - əkinçiləri,
sənətkarları, eləcə də ticarətlə məşğul olanları birləşdirirdi. Bütün vergi
verən zümrənin başında vastrioşansalar dururdu. O, eyni zamanda maliyyə
idarəsinin başçısı hesab olunurdu. Bütün vergi verənlər zümrəsi qezit adlanan
can vergisi və fövqəladə vergilər ödəyirdilər. Kəndlilərdən xaraq adlanan torpaq
vergisi tutulurdu. Kəndlilərin üzərinə bir sıra mükəlləfiyyətlər də qoyulmuşdu.
Onlar irriqasiya qurğularının, qalaların və inzibati binaların tikintisinə cəlb
edilirdilər. I Xosrovun dövründə üzərinə vergi qoyulmuş torpaqlar siyahıya
alınırdı. Vergi vahidi 1/10 hektara bərabər olan qarib sayılmağa başladı. Torpaq
vergisinin miqdarı əkilən bitkinin xarakterindən asılı olaraq müxtəlif idi.
Məsələn, bir qarib buğda və ya arpa sahəsindən bir dirhəm, bir qarib üzümlükdən
8 dirhəm, bir qarib qarayonca sahəsindən 7 dirhəm alınırdı. Dörd xurma
palmasından və altı zeytun ağacından isə 1 dirhəm vergi tutulurdu. I Xosrovun
dövründə əmlakın qədərindən asılı olaraq 20-50 yaşlı kişilərdən 12, 8, 6 və 4
dirhəm can vergisi müəyyən edilmişdi. Kübar nəsillər, əyanlar, döyüşçülər,
katiblər, kahinlər və məmurlar can vergisindən azad idilər. Vergilərin
ödənilməsi çətin olduğundan dörd aydan bir, yəni ildə üç dəfə alınırdı. Torpaq
və can vergisi ilə yanaşı əhalidən başqa vergilər də tutulurdu.