Qeyd edilən fərmanlardan irəli gələn məsələlərin həlli ilə bağlı 2002-ci ilin
sonunda Vergilər Nazirliyinin
strukturunda əsaslı dəyişikliklər edildi.
Ümumilli lider Heydər Əliyevin vergi xidmətinə olan diqqəti və qayğısının
nəticəsi olaraq, vergi ödəyicilərinə
göstərilən xidmətin yüksək səviyyədə təşkili də vergi sistemində aparılan
islahatların mühüm istiqamətlərindəndir.
2000-ci ildə respublikamızın yerli vergi orqanlarında
məlumatlandırma şöbələri,
2002-ci ilin sonunda vergi
ödəyicilərinin məlumatlandırılması işini gücləndirmək məqsədilə nazirliyin
mərkəzi aparatında Vergi ödəyicilərinə
xidmət idarəsi yaradılmışdır, Orta ümumtəhsil məktəblərində 3-11
siniflərdə vergilərin tədrisi ilə bağlı vergilər sahısində dərs vəsaitləri
2000-ci ildən buraxılmış və məktəblərə
paylanılmışdır.
Azərbaycan Respublikasının Vergi Məcəlləsi Azərbaycan Respublikasında
vergi sisteminin, vergitutmanın ümumi əsaslarını, vergilərin müəyyən edilməsi,
ödənilməsi və yığılması qaydalarını, vergi ödəyicilərinin və dövlət vergi
orqanlarının, habelə vergi münasibətlərinin digər iştirakçılarının vergitutma
məsələləri ilə bağlı hüquq və vəzifələrini, vergi nəzarətinin forma və
metodlarını, vergi qanunvericiliyinin pozulmasına görə məsuliyyəti, dövlət vergi
orqanlarının və onların vəzifəli şəxslərinin hərəkətlərindən
(hərəkətsizliyindən) şikayət edilməsi qaydalarını müəyyən edir. Vergi
Məcəlləsinin əsas məqsədi aşağıdakı mühüm vəzifələrin həyata keçirilməsidir:
-ədalətli, sabit, vahid vergi sisteminin bərqərar olunması, vahid vergi
məkanında onun bütün elementlərinin qarşılıqlı əlaqəsinin hüquqi mexanizmlərinin
yaradılması;
-sahibkarların və dövlətin balanslaşdırılmış maraqlarının nəzərə alınması;
-vahid vergi hüququ bazasının formalaşdırılması, vergi hüquq pozuntularına görə
məsuliyyət sisteminin təkmilləşdirilməsi.
Vergi Məcəlləsi vergi orqanları ilə vergi ödəyiciləri arasındakı qarşılıqlı
vergi münasibətlərini keyfiyyətcə yeni səviyyəyə çıxaran bütün prosessual
halları nəzərdə tutur. Bununla belə, tam ədalətli vergitutmanın bütün
incəliklərini özündə birləşdirən vergi sisteminin, vergi qanunvericiliyinin
yaradılması demək olar ki, hələ dünyanın heç bir ölkəsinə müəssər olmamışdır.
Ona görə də vergi qanunvericiliyi mütəmadi olaraq təkmilləşdirilir, onda müəyyən
dəqiqləşmələr aparılır.
Ulu öndər Heydər Əliyevin rəhbərliyi altında vergi siyasətinin
konsepsiyasının əsas konturları müəyyənləşdirildi və bu sahədə radikal
islahatların aparılmasına başlanıldı.