5.Fiziki şəxslərdən gəlir vergisi. 

Vergi ödəyiciləri aşağıdakı kimi müəyyən edilmişdi:

•  Azərbaycan Respublikasında fiziki şəxslərdən gəlir vergisinin ödəyiciləri Azərbaycan Respublikasında istər daimi yaşayış yeri olan, istərsə də olmayan Azərbaycan Respublikası vətəndaşları, xarici vətəndaşlar və vətəndaşlığı olmayan şəxslərdir.

•  Azərbaycan Respublikasında daimi yaşayış yeri olan fiziki şəxslərə təqvim, ilində Azərbaycan Respublikasında üst-üstə azı 183 gün yaşayan şəxslər aid edilirdi.

Vergitutma obyekti kimi aşağıdakılar müəyyən edilmişdir:

1. Qanunla müəyyən edilmiş qaydada və şərtlərlə fiziki şəxslərdən vergitutma obyekti təqvim ili ərzində məcmu gəlir, aylıq gəlir, mülki-hüquqi müqavilələrə əsasən işlərin görülməsindən götürülən gəlirlər

2. Qanunla müəyyən edilmiş qaydada və şərtlərlə təqvim ili ərzində məcmu gəlir Azərbaycan Respublikasında daimi yaşayış yeri olan aşağıdakı fiziki şəxslərdən vergitutma obyekti kimi tətbiq edilirdi:

·        Azərbaycan Respublikasının maddi, intellektual və başqa ehtiyatlarından, onun qitə şelfindən və iqtisadi zonasından birbaşa və ya dolayısı ilə istifadə etməklə əlaqədar olaraq Azərbaycan Respublikasının hüdudlarından kənarda gəlir götürmüş şəxslər;

·        hüquqi şəxs yaratmadan sahibkarlıq fəaliyyəti ilə məşğul olan və orta aylıq gəliri qanunvericiliklə müəyyən edilmiş minimum əmək haqqının 12 mislindən çox olan şəxslər;

·        müəlliflik haqqı alan şəxslər, o cümlədən müəlliflərin ilk dəfə haqq alan vərəsələri;

·        qeyri-dövlət banklarında və kredit idarələrində əmanətlər üzrə faizlər və uduşlar şəklində gəlir, habelə qanunvericilikdə müəyyən edilmiş qaydada qeyri-dövlət orqanları tərəfindən keçirilən lotereyalar üzrə uduşlar alan şəxslər.

1. Vergitutma obyekti kimi təqvim ili ərzində məcmu gəlirin tətbiq edildiyi fiziki şəxslər faktik götürdükləri gəlir və bu gəlirin əldə edilməsi ilə bilavasitə bağlı olan xərclər barəsində Qanunla müəyyən edilmiş qaydada deklarasiya təqdim edirdilər.

2. Mülki-hüquqi müqavilələrə əsasən işlərin görülməsindən götürülən gəlir Qanunla müəyyən edilmiş qaydada və şərtlərlə həmin işləri görmüş hər hansı fiziki şəxslərdən vergitutma obyekti kimi tətbiq edilirdi.

3. Vergitutma zamanı istər pul şəklində, istərsə də natura şəklində götürülən gəlir nəzərə alınırdı.

4. Natura şəklində götürülən gəlir dövlət qiymətləri üzrə, bunlar olmadıqda isə bazar qiymətləri üzrə nəzərə alınırdı.

5. Xarici valyuta şəklində götürülən gəlir Azərbaycan Respublikası Milli Bankının gəlir götürülən vaxt qüvvədə olmuş məzənnəsi üzrə nəzərə alınırdı.

6. Vergi tutulan gəlirin məbləği Qanunla müəyyənləşdirilmiş qaydada təyin edilirdi.

7. Vergi ödəniş mənbəyində tutulur, deklarasiya təqdim olunmasının nəzərdə tutulduğu hallarda dəqiqləşdirilir və yerli büdcəyə daxil edilirdi.